වැල්ලවත්ත මුහුදු මාර්ගයේ දී දේපොළ හානි පමණක් සිදුවූ රිය අනතුරක් මුල්කරගෙන
මහජන ආරක්ෂක අමාත්‍යාංශයේ වත්මන් ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න අත්අඩංගුවට ගෙන රක්ෂිත බන්ධනාගාරගත කිරීම යම් සැලසුමකට අනුව සිදුවූ කුමන්ත්‍රණයක් බව ඒ සම්බන්ධයෙන් කෙරෙන මූලික විමර්ශනවලින් අනාවරණය වෙමින් ඇතැයි පොලිස් මූලස්ථාන තොරතුරු සඳහන් කරයි.
ඒ අනුව මේ සම්බන්ධයෙන් පොලිස් විශේෂ විමර්ශන ඒකකය (siu) පරීක්ෂණයක් ආරම්භ කර ඇතැයි පොලිස් තොරතුරු අනාවරණය කළේය.
මෙම අනතුර සිදුවන විට පොලිස්පතිවරයා ලෙස සේවයේ නිරතව සිටි සී.ඩී. වික්‍රමරත්න විසින් සටහන් තැබූ පොතක් ද එම ඒකකය සිය භාරයට ගෙන ඇති බව ආරංචි මාර්ග අනාවරණය කළේය.
මෙම අනතුර සිදුවන්නේ පසුගිය වසරේ ඔක්තෝබර් 28 වැනිදා රාත්‍රී කාලයේ දී ය. රවී සෙනෙවිරත්න බම්බලපිටිය දෙස සිට දෙහිවල දෙසට ජිප් රථයකින් ගමන් කරමින් සිටිය දී එම ජිප් රථය වැල්ලවත්ත පොලිස් වසමේ දී මාර්ගය අයිනේ නවතා තිබුණු බස් රථයක හා මෝටර් රථයක ගැටී තිබුණි. දේපළ හානි පමණක් සිදුව තිබුණු මෙම අනතුරින් රවී සෙනෙවිරත්න ට සීරීම් තුවාලයක්වත් නොවීය.
වැල්ලවත්ත පොලිසිය මේ සම්බන්ධයෙන් විමර්ශන පවත්වා අනතුරක් වළක්වා නොගැනීම සම්බන්ධයෙන් සහ බීමතින් රිය පැදවීම සම්බන්ධයෙන් රවී සෙනෙවිරත්න ව අත්අඩංගුවට ගෙන තිබුණි.
මෙම අනතුර පොලිස් ඇප ලබා දිය හැකි වරදක් වූවත් ඉහළ පොලිස් නිලධාරියකු සහ දේශපාලනඥයකුගේ මැදිහත්වීමෙන් රවී සෙනෙවිරත්ත අධිකරණයට ඉදිරිපත්කර රක්ෂිත බන්ධනාගාරගත කිරීමට සූදානමක් ඇති බව රවී සෙනෙවිරත්න ට සමීප හිතවත් විශ්‍රාමික හා ඒ වන විට සේවයේ සිටි නිලධාරීන්ට දැනගන්නට ලැබී තිබී ඇත. ඒ බව එම නිලධාරීන් එවකට පොලිස්පතිවරයා ලෙස සේවයේ නිරතව සිටි සී.ඩී. වික්‍රමරත්න ව දැනුම්වත් කර තිබේ.
එවිට පොලිස්පති සී.ඩී. වික්‍රමරත්න වැල්ලවත්ත පොලිස් ස්ථානාධිපතිවරයාට දුරකතන ඇමතුමක් ඔස්සේ කතා කර අනතුර සම්බන්ධයෙන් තොරතුරු විමසා බලා රවී සෙනෙවිරත්න ට ඇප ලබාදීමට හැකියාව ඇති බැවින් ඇප ලබා දෙන ලෙස දැනුම් දී තිබේ. එහි දී වැල්ලවත්ත පොලිස් ස්ථානාධිපතිවරයා පොලිස්පතිවරයාව දැනුම්වත් කර ඇත්තේ පොලිස්පතිවරයාට පහළින් ඒ වන විට සිටි යම් ජ්‍යෙෂ්ඨ නියෝජ්‍ය පොලිස්පතිවරයෙක් විසින් ඇප ලබා නොදෙන ලෙස තමාට නියෝග ලබා දී ඇති බවය.
එහි දී පොලිස්පති සී.ඩී. වික්‍රමරත්න වැල්ලවත්ත පොලිස් ස්ථානාධිපතිවරයාට පවසා ඇත්තේ ඇප ලබාදීම තම නියෝගයක් සේ සලකා කටයුතු කරන ලෙසත් ඒ සම්බන්ධයෙන් පොලිස් පොතේ සටහනක් ද තබන ලෙසත්ය. අනතුරුව පොලිස්පතිවරයා එවකට කොළඹ දකුණ කොට්ඨාසය භාර ජ්‍යෙෂ්ඨ පොලිස් අධිකාරිවරයාට ද ඇමතුමක් දී පවසා ඇත්තේ රවී සෙනෙවිරත්න පොලිස් සේවයේ සිටි කීර්තිමත් නිලධාරියෙක් බැවින් ඔහුට නරක විදිහට සැලකීම උචිත නොවන බවය. එබැවින් පොලිස් ඇප ලබාදීමට අවශ්‍ය කටයුතු කරන ලෙස ඔහුට ද දැනුම් දී තිබී ඇත.
එවිට එම නිලධාරියා ද ජ්‍යෙෂ්ඨ නියෝජ්‍ය පොලිස්පතිවරයාගෙන් එල්ලවන බලපෑම ගැන පැවසීම හේතුවෙන් පොලිස්පති සී.ඩී. වික්‍රමරත්න විසින් ඒ බව ජ්‍යෙෂ්ඨ නියෝජ්‍ය පොලිස්පතිවරයාට දුරකතන ඇමතුමක් මඟින් දැනුම් දී තිබේ. එම ඇමතුමෙන් ටික වේලාවකට පසු යම් දේශපාලනඥයකු විසින් සී.ඩී. වික්‍රමරත්න ට දුරකතන ඇමතුමක් ලබාගෙන රවී සෙනෙවිරත්න ට ඇප ලබාදීමට නියෝග ලබාදීම ගැන දොස් නඟා ඇති බව සඳහන්ය. අවසානයේ දී සිදුව ඇත්තේ රවී සෙනෙවිරත්න අධිකරණයට ඉදිරිපත් කිරීමටය. එහි දී ඔහු රක්ෂිත බන්ධනාගාරගත විය.
මෙම සිදුවීම මුල්කරගෙන විශ්‍රාමික පොලිස් නිලධාරීන් සංවිධානගත වෙමින් රවී සෙනෙවිරත්න ට මෝසමක් මඟින් ඇප ලබා ගැනීමට කටයුතු කළ අතර පොලිස් සාමූහිකය ලෙස වර්ධනය වෙමින් වත්මන් ජනාධිපති අනුර කුමාර දිසානායක ජනාධිපති කරවීමේ සටනට රවී සෙනෙවිරත්න නායකත්වය ගන්නේ එම පොලිස් සාමූහිකය හරහාය.
@ගයාන් කුමාර වීරසිංහ
උපුටාගැනීම - cnews
