වතිකානු තානාපති ආචාර්ය බ්‍රයන් උදයිග්වේ ජනාධිපති අනුර කුමාර දිසානායක හමුවූ අතර
එහිදී ෆ්‍රැන්සිස් පාප් වහන්සේ ගේ හෘදයාංගම සුබ පැතුම් පිරිනැමූ බව ජනාධිපති මාධ්‍ය අංශය (PMD) පවසයි.
නව ජනාධිපතිවරයාගේ නායකත්වය යටතේ ශ්‍රී ලංකාවේ අඛණ්ඩ සාර්ථකත්වය සහ සෞභාග්‍යය සඳහා තානාපති උදයිග්වේ සුබ පැතුම් එක් කළේය.
ආචාර්ය උදයිග්වේ සිය ප්‍රකාශය මගින් ශ්‍රී ලංකාවේ අනාගතය පිළිබඳ සුබවාදී ජනතා අපේක්ෂාවන්ට අනුකූලව සාධනීය වර්ධනයන් ඉදිරියේදී සිදුවෙමින් පවතිනු ඇති බවට විශ්වාසය පළ කළේය.
ශ්‍රී ලංකාව සම්බන්ධයෙන් ජනාධිපතිවරයාගේ දැක්ම සාක්ෂාත් කර ගැනීම සඳහා වතිකානුවේ සහාය ලබාදෙන බව පැවසූ අතර රටේ සහ එහි පුරවැසියන්ගේ සුබසාධනය සඳහා ජනාධිපති දිසානායක දක්වන කැපවීම ඔහු ඇගයීමට ද ලක් කළේය.
ඛේදජනක පාස්කු ඉරිදා බෝම්බ ප්‍රහාරය සම්බන්ධයෙන් විනිවිදභාවයෙන් සහ විශ්වසනීය පරීක්‍ෂණ පැවැත්වීමට ජනාධිපති දිසානායක ගත් පියවර පිළිබඳව ද වතිකානු තානාපතිවරයා සිය ප්‍රශංසා කළේය.
වින්දිතයින්ට සහ ඔවුන්ගේ පවුල්වලට යුක්තිය සහ සුවය ලබා දීම සඳහා ජනාධිපතිවරයා ගෙන යන අඛණ්ඩ උත්සාහය අගය කරමින් ඊට වතිකානුවේ පූර්ණ සහයෝගය ලබා දෙන බවට වෛද්‍ය උදයිග්වේ සහතික විය.
ශ්‍රී ලංකාව සහ වතිකානුව අතර ශක්තිමත් රාජ්‍ය තාන්ත්‍රික සබඳතා මෙම හමුවේදී අවධාරනය කෙරුණු අතර, නායකයින් දෙදෙනාම ජාතියේ සහ එහි ජනතාවගේ අභිවෘද්ධිය සඳහා අන්‍යෝන්‍ය සහයෝගීතාව අවධාරණය කළහ.
