තහනම ඉවත් කිරීමෙන් පසු ශ්‍රී ලංකාවට ආනයනය කරන වාහන දින 90ක් ඇතුළත ලියාපදිංචි කළ යුතු අතර,
එසේ නොකළහොත් ලියාපදිංචි නොකළ වාහන සඳහා 3%ක දඩ මුදලක් නියම කෙරෙන අතර එය උපරිම 45%කට යටත්ව සිදුවන බව මුදල් අමාත්‍යාංශය පවසයි.
පාර්ලිමේන්තු මන්ත්‍රී හර්ෂ ද සිල්වා ගේ ප්‍රධානත්වයෙන් පාර්ලිමේන්තුවේදී රැස්වූ රාජ්‍ය මුදල් පිළිබඳ කාරක සභාවට මුදල් අමාත්‍යාංශයේ නිලධාරීන් මේ බව දැනුම් දී ඇත.
විශේෂයෙන් ඕනෑම ආනයනකරුවෙකු විසින් ආනයනය කරන ලද මුළු වාහන සංඛ්‍යාවෙන් 25% ක් මාස 6 ක් ඇතුළත ලියාපදිංචි නොකළහොත්, ආනයනය පිළිබඳ එකඟතාව අත්හිටුවන බව ද ඔවුන් පවසා තිබේ.
මුදල්, සැලසුම් සහ ආර්ථික සංවර්ධන අමාත්‍යාංශය නියෝජනය කරන නිලධාරීන් පැවසුවේ යම් යම් කොන්දේසි යටතේ වාහන ආනයනයට අවසර දී ඇති බවත්, සාමාන්‍ය ආර්ථික කටයුතු නැවත ආරම්භ කිරීම දිරිමත් කිරීම සහ රටේ ආර්ථික ස්ථාවරත්වය ආරක්ෂා කිරීම සඳහා විදේශ විනිමය සංචිත ආරක්ෂා කිරීම, අතිරික්ත වාහන සංඛ්‍යාවක් ආනයනය කිරීම අධෛර්යමත් කිරීම සහ අනවශ්‍ය මෝටර් රථ තොග ඉවත් කිරීම යන කරුණු සැලකිල්ලට ගනිමින් වාහන ආනයනයට අදාළව මෙම කොන්දේසි පනවා ඇති බවයි.
පුද්ගලික ධාරිතාවයෙන් වාහන ආනයනය කිරීමට කැමති නම්, එක් වාහනයක් පමණක් ආනයනය කළ හැකි බවත්, වෙළෙන්දෙකුට එවැනි කොන්දේසියක් නොමැති බවත් අමාත්‍යාංශ නිලධාරීන් ප්‍රකාශ කළහ.
ශ්‍රී ලංකාවේ දේශීය විදුලි වාහන කර්මාන්තය ආරක්ෂා කිරීම සඳහා ප්‍රතිපත්තිමය සහාය ඉල්ලා සිටීම සම්බන්ධයෙන් ද කමිටුව සාකච්ඡා කර තිබේ.
