පැරිස් සමාජය සහ ඒකාබද්ධ ආධාර කණ්ඩායම් සමඟ ණය ප්‍රතිව්‍යූහගකරණ ගිවිසුම්වලට අත්සන් තැබීම සඳහා කැබිනට් අනුමැතිය ලබා දුන් බව
කැබිනට් මාධ්‍ය ප්‍රකාශක, අමාත්‍ය බන්දුල ගුණවර්ධන පවසයි. ඊට අදාළ ගිවිසුම්වලට හෙට (26) දිනයේ දී අත්සන් තැබීමට නියමිත බවත් කැබිනට් ප්‍රකාශක අමාත්‍ය බන්දුල ගුණවර්ධන ඊයේ (25) මාධ්‍ය හමුවේදී පැවසුවේ ය.
මුළු ණය බරින් රුපියල් බිලියන 17ක් අඩු කර ගැනීම
මේ අතර ශ්‍රී ලංකාව අද ඔවුන් සමඟ ප්‍රතිව්‍යුහගත කිරීමේ ගිවිසුම් අත්සන් කිරීමේදී ද්විපාර්ශ්වික ණය හිමියන් වන ඉන්දියාව සහ චීනය සහ පැරිස් සමාජය වෙතින් ණය පියවීම සඳහා සහන කාලයක් ලබා ගැනීමට ඉඩ ඇති බව තතු දත් ආරංචි මාර්ග පවසයි.
ශ්‍රී ලංකාව පැරිස් සමාජය, ඉන්දියාව සහ චීනය සමඟ පුළුල් සාකච්ඡා පවත්වා ඇති අතර ණය ගැනීම් පියවීම සඳහා සමාන කොන්දේසි යටතේ ඔවුන් සමඟ ගිවිසුම්වලට එළැඹීමට නියමිතය.
රජයේ සංඛ්‍යාලේඛනවලට අනුව, ඩොලර් බිලියන 37 ක හිඟ විදේශ ණයවලින් සියයට 28.5 ක් ද්විපාර්ශ්වික ණය හිමියන් සතුය. චීනය විශාලතම තනි ද්විපාර්ශ්වික ණය දෙන්නා වන අතර එය ඩොලර් බිලියන 4.66 කි. ජපානය ඩොලර් බිලියන 2.35 ක් සමඟ දෙවන ස්ථානයේ සිටින අතර ඉන්දියාව ඩොලර් බිලියන 1.36 ක් සමඟ තුන්වන ස්ථානයේ සිටී.
ශ්‍රී ලංකාවේ වාණිජ ණය ගැනීම්වලට ජාත්‍යන්තර ස්වෛරී බැඳුම්කර (ISB) හරහා ඩොලර් බිලියන 12.55 ක් සහ චීන සංවර්ධන බැංකුවෙන් තවත් ඩොලර් බිලියන 2.18 ක් ඇතුළත් වේ. ශ්‍රී ලංකාව සිය ණය ප්‍රතිව්‍යුහගත කිරීමේදී චීනය සමඟ වෙනම ගනුදෙනු කර ඇත. ඒ අනුව චීන EXIM බැංකුව සමඟ අද(26) ගිවිසුම අත්සන් කිරීමට නියමිතය. මේ අතරතුර, වාණිජ ණය ප්‍රතිව්‍යුහගත කිරීම සඳහා චීන සංවර්ධන බැංකුව සමඟ සාකච්ඡා දිගටම කරගෙන යනු ඇත.
2028 දක්වා ද්විපාර්ශ්වික ණය හිමියන්ට ණය ගෙවීම කල්දැමීමට රජය අපේක්ෂා කරන බවත් ඉන් පසුව 2042 වසරෙන් අවසන් වන කාලසීමාව තුළ ආපසු ගෙවීම සම්පූර්ණ කිරීමට රජය අපේක්ෂා කරන බවත් මීට පෙර ජනාධිපති රනිල් වික්‍රමසිංහ ප්‍රකාශ කළේය.
එසේම ශ්‍රී ලංකාව සිය සමස්ත ණය බර ඇමෙරිකානු ඩොලර් බිලියන 17කින් අඩුකර ගැනීමට අපේක්ෂා කරන බවද ජනාධිපතිවරයා මීට පෙර ප්‍රකාශ කළේය.
ශ්‍රී ලංකාව මේ වන විට ජාත්‍යන්තර මූල්‍ය අරමුදල සමඟ වසර හතරක විස්තීරණ අරමුදල් පහසුකම් වැඩසටහනක් යටතේ කටයුතු කරනු ලබයි. ඒ අනුව ද්විවාර්ෂික සමාලෝචනවලින් පසු කොටස් වශයෙන් බෙදා හැරෙන ඩොලර් බිලියන 2.9ක් එමගින් රටට ලැබෙනු ඇතැයි අපේක්ෂා කෙරේ.
ගිවිසුම අත්සන් කිරීම සඳහා මුදල් අමාත්‍යාංශයේ නියෝජිත පිරිසක් ප්‍රංශය බලා පිටත්ව යන බව ඊයේ කැබිනට් ප්‍රකාශක අමාත්‍ය බන්දුල ගුණවර්ධන ප්‍රකාශ කළේය.
"විශේෂයෙන් රටේ බංකොලොත් භාවය ප්‍රකාශයටපත් කළ පසු ජනාධිපතිවරයා විසින් ශ්‍රී ලංකාවට ආධාර සැපයූ මිත්‍ර රටවල රාජ්‍ය නායකත්වයන් සමග විශේෂයෙන් ඉන්දියාව, එවගේම ජපානයේ රාජ්‍ය නායකත්වයන්, චීනය... චීන රාජ්‍ය නායකත්වය පැරිස් ආධාර කණ්ඩායම් ලෝක ප්‍රජාව සමග විශාල සාකච්ඡා ප්‍රමාණයක් පවත්වලා දේශීය සහ අන්තර් ජාතික විශේෂඥ විද්වතුන් රැසකගේ අධාරය සහයෝගීතවය හා මඟපෙන්වීම යටතේ සාකච්ඡාවල අවසන් අවස්ථාවලට මුදල් අමාත්‍යාංශයට, ශ්‍රී ලංකා මහ බැංකුවට සහ අනෙකුත් පිරිස්වලට හැකියාව ලැබිලා ඒ සමග ඇතිකර ගැනීමට අපේක්ෂා කරන ණය ප්‍රතිව්‍යුහගත කරන ගිවිසුම පිළිබඳ දිර්ඝ පැහැදිලි කිරීම ජනාධිපතිවරයා විසින් ඊයේ කැබිනට් මණ්ඩලයට ඉදිරිපත් කළා.
එහිදී ජනාධිපතිවරයා කරුණු පැහැදිලි කිරීමෙන් පසු ඒ සඳහා අදාළ ගිවිසුම් හෙට දිනයේදී අත්සන් තැබීම සඳහා පැරිස් ඒකාබද්ධ ආධාර කණ්ඩායම්වල හමුවීම් සඳහා මුදල් අමාත්‍යාංශයේ ලේකම්වරයා, භාණ්ඩාගරයේ ප්‍රධානීන් සහ අපේ රාජ්‍ය අමාත්‍යවරුන්ද ඇතුළු ශ්‍රී ලංකා නියෝජිත කණ්ඩායම් එරටට පිටත් කර යවා තිබෙනවා. ඒ සඳහා ශ්‍රී ලංකා ආණ්ඩුව වෙනුවෙන් එකි ගිවිසුම්වලට අත්සන් තැබීම සඳහා කැබිනට් මණ්ඩලයේ අනුමැතිය ලබාදුන්නා.
ජනාධිපතිවරයා ප්‍රකාශයට පත්කළා මේ අත්සන් තබන ලබන සෑම ගිවිසුමක් හා එම ක්‍රවේදයන් සම්පූර්ණ විස්තරාත්මක කරනු ශ්‍රී ලංකා පාර්ලිමේන්තුව ඉදිරිපත්කරන බවත් ඒ සමගම රටේ සමස්ත ලාංකිය ජනතාවට ජාතිය අමතලා, මේ ජයග්‍රහණයේ සුබ ආරංචිය ලබාදෙන බවත් සඳහන් කළා."
