එක්සත් ජනරජ පෙරමුණේ ජනරජ වාර්ෂික මහා සමුළුව
ජුනි මස 01 වෙනිදා පැවැත්වීමට කටයුතු යොදා ඇත.
බංකොලොත් බවෙහි ගිළුනු දේශය ඉන් ගොඩගනු වස් එකට එක්ව සිදු කෙරෙන සාමූහික ප්‍රයත්නයෙහි එක් පියවරක්, දේශය වෙනුවෙන් එක්වන පියවරක් ලෙස සමුළුව නම් කර ඇත.
ඒ, ජුනි මස 01 වෙනිදින පස්වරු 3.00ට සුගතදාස ගෘහස්ත ක්‍රීඩාංගනයේදී ය.
ලංකාදීප පුවත්පතේ මාධ්‍යවේදී චමින්ද මුණසිංහ විසින් ජනරජ පෙරමුණේ නායක පාර්ලිමේන්තු මන්ත්‍රී පාඨලී චම්පික රණවක සමග අද දේශපාලනයේ දිශානතිය, ආණ්ඩුවේ ගමන් මග, එක්සත් ජනරජ පෙරමුණේ වැඩපිළිවෙළ, ජුනි 01 වැනිදා කෙරෙන්නේ කුමක්ද? යනාදී කරුණු සම්බන්ධයෙන් කළ සාකච්ඡාව පහත පළ කෙරේ.
ප්‍රශ්නය:- අද වන විට දේශපාලනය විවිධ පැතිවලට දෝලනය වෙමින් තිබෙනවා. එක්සත් ජනරජ පෙරමුණ මේ තත්වය විග්‍රහ කරගන්නේ කොහොමද?
පිළිතුර:- මහජනයාගේ පැත්තෙන් අපි ප්‍රධාන කරුණු දෙකක් දකිනවා. රට බංකොලොත්වීම නිසා ඇතිවී තිබෙන තත්වය ප්‍රධානයි. විදුලිය, තෙල්, පොහොර, ගෑස්, කෑම නැතුව මහජනයා කැරැලි ගහන තත්වයක් තිබුණා. ඒක දැන් වෙනස් වෙලා. ඒ වෙනස වුණාට ඒ යුගයට බලපෑ අර්බුදය වෙනස් වෙලා නැහැ. ඒ වගේම තෙල්, ගෑස්, විදුලිය, ආහාර, පොහොර, බෙහෙත් මිල තුන් හතර ගුණයකින් වැඩිවෙලා. මේ පසුබිම යටතේ පවුල්වලින් සියයට අනූවකට මේ වියදම දරාගන්න බැරි බව ජන හා සංඛ්‍යා ලේඛන දෙපාර්තමේන්තුව ප්‍රකාශ කර තිබෙනවා. තිබෙන අලුත් තත්වය එයයි. ජනතාවට දරාගත නොහැකි ජීවන බරක් තිබෙනවා. 2022 දී වූවා සේ යළිත් වරක් කඩා වැටීමක් සිදුවේද යන බිය ජනතාවගේ යටි සිතේ තිබෙනවා.
මේ විපතට මුල දේශපාලකයන් කියන විශ්වාසයත් ජනතාවගේ සිත්වල තිබෙන කාරණයක්. ඒක දෙවැන්න. දේශපාලකයන් පිළිබඳ විශ්වාසය, ඔවුන්ගේ කෙරුවාව පිළිබඳ අප්‍රසන්න හැඟීමක් ජනතාව අතර තිබෙනවා. ඒ නිසා වෙනස් විධියකට බලන්න ඕන. වෙන කට්ටියකට මේක බාර දෙන්න ඕන වැනි හැඟීමකුත් මතුව තිබෙනවා. දැනට රට ජනාධිපතිවරණය දෙසට රට ගමන් කරමින් තිබෙනවා. එය අතිශය තීරණාත්මකයි. මේ ජනාධිපතිවරණයෙන් කවුරු දිනුවත් මහ මැතිවරණයක් පවත්වනවා. පළාත් පාලන, පළාත් සභා ඡන්දත් ඒ අනුව පවත්වාවි. වාන්දොර ඇරියා වගේ මැතිවරණ හතරක් ඉදිරියට අපි ගමන් කරමින් සිටිනවා.
විවිධ සමීක්ෂණ කර තිබෙනවා. සැලකිය යුතු ප්‍රතිශතයක් ඡන්දය කාටවත් දීමට තීරණය කර නැති බව ඒවායෙන් අනාවරණය වෙනවා. ඒ වගේම මේ ක්‍රමය සහ අවිශ්වාසය මත පදනම්ව සියයට 40ක පමණ පිරිසක් සිටිනවා. කිසිම පක්ෂයකට හෝ අපේක්ෂකයකුට සියයට පනහ ඉක්මවූ ප්‍රතිචාරයකුත් නැහැ. ඒ වගේම බලගතු සම්ප්‍රදායික පක්ෂවලට තිබෙන්නේ සියයට දහයට අඩු ප්‍රතිචාරයක්. මේ තත්වය අපට පේන්න තිබෙනවා.
මේ රටේ ප්‍රධාන ගැටලුව පවුලේ ආදායම වැඩිකර වියදම අඩුකර ගැනීම රටේ ආදායම වැඩිකර වියදම අඩුකර ගැනීම බව පැහැදිලියි. මේ කටයුත්තට ප්‍රායෝගික වැඩ පිළිවෙළක් අවශ්‍යයි. තමන් පාලනය කිරීමට යම් සුදුසුකම් තිබෙන පිරිසක් ජනතාව ඉල්ලනවා. ඒක ජනතාවගෙත් වගකීමක්. අපි උත්සාහ කරන්නේ ඒ අරමුණ ඉටුකර ගැනීමටයි.
ප්‍රශ්නය:- ඔබ කියන කාරණා ඉටුකර ගනිමින් වත්මන් ආණ්ඩුව ඉදිරියට යන බව සිතෙන්නේ නැතිද?
පිළිතුර:- මම මුලින් කියූ පළමු තත්වයෙන් දෙවැනි තත්වයට මේ ආණ්ඩුව ගියා. ඒක තමන්ගේ ජයග්‍රහණයක් හැටියට ආණ්ඩුව පෙන්නනවා. ඒක එහෙම නෙමෙයි කියන්න තරම් අපි කුහක වෙන්නේ නැහැ. බෙහෙත්, විදුලිය, පොහොර, තෙල්, ආහාර නැති මිනිස්සු පාරේ කැරැලි ගසන තත්වයට වඩා හොඳ තැනකට පැමිණ තිබෙනවා. එහෙත් එදාට වඩා තුන් ගුණයක් මේවාට ගෙවන්න සිදුව තිබෙනවා. ඒ වගේම ණය ගෙවා නැහැ. මේ තාවකාලික ජොලිය ලැබී තිබෙන්නේ ණය ගෙවන්නේ නැතුව.
මේ ණය ආපසු ගෙවීමට ගිවිසුමක් ඇතිකර ගෙනත් නැහැ. ජුනි මාසයේ මූල්‍ය අරමුදල ඉදිරියට යනවිට ඒ ගිවිසුම අවශ්‍යයි. ගිවිසුමක් ඇතිකරගත් පසු ණය ආපසු ගෙවීමට තරම් ශක්තිමත් ඩොලර් ආර්ථිකයක් තිබෙනවාද කියන ප්‍රශ්නයත් අපට තිබෙනවා. සංචාරක ව්‍යාපාරයෙන් සහ යුද්දෙට හෝ ලාංකිකයන් රට යවා ඩොලර් ඉපැයීම හැරෙන්න ආණ්ඩුවට වෙන උපාය මාර්ග තිබෙන බවක් පේන්න නැහැ.
රටේ තවත් ප්‍රධාන ප්‍රශ්න ගණනාවක් තිබෙනවා. කතා නම් තිබෙනවා. බලශක්තිය තවත් ප්‍රශ්නයක්. මේ ප්‍රශ්නයට විසඳුමක් හැටියට තෙල් සංස්ථාව කෑලිවලට කඩා විකිණීම සහ විදුලිබල මණ්ඩලය කෑලිවලට කඩා විකිණීම හැරුණු කොට වෙන විසඳුම් පේන්න නැහැ. ඩීසල් මිල මත රටේ නිෂ්පාදනය අඩාල වෙලා. විදුලි බිල නිසා දුප්පත් ජනයාත් කර්මාන්තකරුවනුත් අපහසුතාවට පත්වෙලා. කර්මාන්ත වැසෙමින් යනවා. තවත් කර්මාන්ත රට හැර යනවා. මේවා සම්බන්ධ උපායමාර්ගික වැඩ සටහනක් ආණ්ඩුවට නැහැ.
ප්‍රශ්නය:- ඡන්ද වෙනුවෙන් පොරකන දේශපාලන පක්ෂ රටේ ප්‍රශ්න විසඳීමට වැඩපිළිවෙළක් ඉදිරිපත් කරන බවක් පේන්න නැත්තේ ඇයි?
පිළිතුර:- ඕන තරම් වැඩපිළිවෙළවල් කියවනවා. අපි ආවාම අරහෙම, මෙහෙම කරනවා කියනවා. ත්‍රිකුණාමල දිස්ත්‍රික්කයේ උක් වවා ආසියාවටම උක් සපයන බව කවුද කියා තිබුණා. ත්‍රිකුණාමලයේ තෙල් ටැංකිවලට තෙල් පුරවා රටේ තෙල් මිල බස්සන බව කියා තිබුණා. ඒ වගේම රටේ තිබෙන මිනිරන් සම්පතෙන් ග්‍රැෆීන් හදා ඩොලර් උත්පාදනය කරන බව ප්‍රකාශ වී තිබුණා. දුප්පතුන්ට රුපියල් 20000 බැගින් මාසිකව දෙන බව කියා තිබෙනු දුටුවා. විවිධ පැතිවලින් මේ වගේ කතා ඇසෙනවා. එහෙත් මේවා එකක්වත් යථාර්ථවාදී නැහැ. ත්‍රිකුණාමලයේ උක් වවා ආසියාවට දෙන්න තබා ලංකාවටවත් ප්‍රමාණවත්ව දෙන්න බැහැ. ඔය තෙල් ටැංකිවලින් පිරිමැහෙන්නේ ලංකාවේ අවශ්‍යතාවෙන් පහෙන් එකයි. තාම ග්‍රැෆීන් විකිණෙන්නේ ග්‍රෑම්, මිලිග්‍රෑම්වලින්. ග්‍රැෆීන් තවම හදලත් නෑ. එනිසා මේවා සම්බන්ධ කිසිදු දැනුමක් නැති බාල කණ්ඩායමක් අපි මහා නිධානයක් උඩ ඉන්නවා කියන මතයක් හදන්න උත්සාහ ගන්නවා.
එහෙත් අපි එහෙම නැහැ. පවුලේ වියදම අඩු කරගන්න ක්‍රමවේද අපි ඉදිරිපත් කර තිබෙනවා. විදුලි බිල අඩු කරන නිශ්චිත ක්‍රියාමාර්ගයක්, ඉන්ධන මිල අඩු කරන නිශ්චිත ක්‍රියාමාර්ග, ආහාර මිල අඩු කරන්න නිශ්චිත ක්‍රියාදාමයක්, ආහාර නිෂ්පාදනයට හා ඵලදායීතාව නංවන වැඩ පිළිවෙළක්, පොදු ප්‍රවාහන නංවන ක්‍රමයක්, බලශක්ති කළමනාකරණ වැඩපිළිවෙළක්, ඖෂධ සම්බන්ධ විධිමත් ක්‍රමවේදයක්, ප්‍රජා සෞඛ්‍ය නැංවීමට, නගර නිර්මාණයට වැඩසටහන් ඉදිරිපත් කර තිබෙනවා. විශේෂයෙන්ම රටට ඩොලර් උත්පාදනයට ‘‘ඩෙක්ස්ටොප් ෆැක්ටරි’’ යුගය ඇති කිරීමට සැලසුම් කර තිබෙනවා. රටේ සමාගම් හරහා ජාත්‍යන්තර සන්නාම ඇති කිරීමට ලෝකයේ තිබෙන අගයදාමයන්ට ලංකාවේ ව්‍යාපාර විවෘත කරන යෝජනාවලියක් ඉකුත් පෙබරවාරි 14 වැනිදා අපි ඉදිරිපත් කළා. එම යෝජනාවලිය ජනගත කිරීම ලබන ජුනි 01 වැනිදා සුගතදාස ගෘහස්ථ ක්‍රීඩාංගණයේදී සිදු කෙරෙනවා.
ප්‍රශ්නය:- ඔබ කාලෙන් කාලෙට මේ වගේ වැඩසටහන්, පක්ෂ හදනවා. ඒත් කාලෙකදී මේවා පේන්න නැහැ. ඔබ මේ පෙළගැසෙන්නේ කා වටාද?
පිළිතුර:- අපි මේ දක්වා කළ වැඩවලින් ජනතාව ජයග්‍රහණ ලබාදී තිබෙනවා. 2005 දී අපි ජනපතිවරයකු බිහි කළා. කවුරු මොනව කිව්වත් අද කොටි නැත්තේ ජීවිත බේරී තිබෙන්නේ අපි නිසයි. නැතුව ඒ ජනාධිපතිවත් ඔහුගේ පක්ෂයවත් එදා සිටි අයවත් කොටි පරාජය කරන්න පුළුවන් කියා විශ්වාස කළේ නැහැ. ඒත් අපි ඒ වගකීම ඉටු කළා. කොටි පරාජය කළාට පසු දෙමළ ජනතාව පස්සෙන් පන්නන්න, වෛරයෙන් පලිගන්න අවශ්‍යතාවක් අපට නැහැ. සාමාන්‍ය දෙමළ ජනයා අපේ සමාජයේ කොටසක්. දැන් එල්.ටී.ටී.ඊය නැහැ. ඒත් සමහරු තවමත් ඒ කොටි වලිගවල එල්ලී සිටිනවා.
මහින්ද රාජපක්ෂ යටතේ මේ රටේ දියුණු රාජ්‍යයක් ගොඩනගන්න මග පෙන්නාවි කියා අපි සිතුවා. එහෙත් අන්තිමට වුණේ කිසිදු ආදායමක් ඉපදවෙන්නේ නැති තැන්වල ආයෝජනය කර රට තුළ මහා ජාතික කොල්ලයක් ඇති කර රට බංකොලොත් වීමයි. ඒක අපි මුලින්ම දැක්කා. අනතුරු ඇඟෙව්වා. ඒකට විරුද්ධව නැගී සිටියා. එහෙම කළාම අපට විවිධ ලේබල් ඇලෙව්වා. එහෙත් ඒ ප්‍රජාතන්ත්‍රවාදී විප්ලවය කරන්න අපට හැකි වුණා. යහපාලන ආණ්ඩුව බිහිවුණේ ඒ අනුව. එයින් මහජනයාට ප්‍රතිලාභ දුන්නා. අඩු මිලට ඉන්ධන දුන්නා. කොළඹ කුණු ප්‍රශ්නය විසඳුවා. අද කොළඹ ගංවතුර ප්‍රශ්නයක් තිබෙනවද? ඒවා විසඳුවා. මඩ වගුරුවල ජීවත් වූ 20,000 කට නිවාස තනා දුන්නා. තව වසර තුනක් අපට දුන්නා නම් සැහැල්ලු දුම්රිය අද ධාවනය වෙනවා. තැඹිලි විකුණන තත්වයට පත්ව ඇති පෝට් සිටිය ආයෝජන මධ්‍යස්ථානයක් වෙනවා. හෝමාගම තාක්ෂණ නගරය කරන්න ඉඩ දුන්න නම් මේ වන විට 20000 ක් ‘‘ඩෙක්ස්ටොප් ෆැක්ටරි’’ යුගයට යනවා. ඒ නිසා මොකුත් වුණේ නැහැ කියන්න බැහැ. පසුගිය කාලයේ මේ මහපොළොවේ වෙච්ච දේවල් වුණේ අපෙන් තමයි.
ප්‍රශ්නය:- ජනපතිවරණයක් දෙසට රට තල්ලුවෙමින් පවතින බව ඔබ ප්‍රකාශ කළා. එවන් අවස්ථාවකදී ඔබ හිටගන්නේ කොතැනද?
පිළිතුර:- ඒ සඳහා වන ප්‍රතිපත්ති ප්‍රකාශනය පසුගිය පෙබරවාරි 14 වැනිදා ඉදිරිපත් කළා. ජූනි පළමු වැනිදා ඒ ප්‍රතිපත්ති ප්‍රකාශනය ජනගත කිරීම සිදුකරනවා. මේ දක්වා කිසිම පක්ෂයක් රට වෙනුවෙන්, ජනතාව වෙනුවෙන් වැඩපිළිවෙළක් මේ ආකාරයට ඉදිරිපත් කරනවා අපි දැක්කේ නැහැ. වචනයට සීමා නොවී ප්‍රායෝගිකව ක්‍රියාත්මක කළ හැකි රටේ ජනතාවගේ ප්‍රශ්නවලට තිරසාර විසඳුම් මේ වැඩපිළිවෙළ ක්‍රියාත්මක කිරීමෙන් ලැබෙන බව කියන්න පුළුවන්. මේ මත සන්ධානයක් ගොඩනගන්න බලාපොරොත්තු වෙනවා. ජනාධිපති අපේක්ෂකයා කවුද කියා ඒ සන්ධානයෙන් තීරණය කරාවි.
ප්‍රශ්නය:- මේ වන විට ප්‍රධාන ධාරාවේ දේශපාලන පක්ෂ සන්ධාන ගණනාවක් ගොඩනගමින් සිටිනවා. මෙවැනි පසුබිමක තවත් සන්ධානයකට ඉඩක් තිබෙනවාද?
පිළිතුර:- රටට ජනතාවට අතිශය වැදගත් වැඩපිළිවෙළක් අපි ඉදිරිපත් කර තිබෙනවා. පොහොට්ටුව හැර අනෙක් අයගේ සන්ධානවලට අපි විවෘතයි. ඒ අයත් සමඟ අපි සාකච්ඡා කරමින් යනවා. ඒ වගේම ඒ සන්ධානවලට නැති විශාල පිරිසක් සිටිනවා. ස.ජ.බ, ජ.වි.ෙප පොහොට්ටුව සමඟ නැති පිරිසක් සිටිනවා. ඒ පිරිස් සමඟ මේ පුළුල් සන්ධාන සාකච්ඡාව ඉදිරියට යමින් තිබෙනවා.
ප්‍රශ්නය:- ජනපතිවරණයට කලින් මහ මැතිවරණය අවශ්‍ය බවට පොහොට්ටුව ඉල්ලීම් කරන බව කතා වෙනවා. කලින් අවශ්‍ය ජනපතිවරණයද මහ මැතිවරණයද කියන තැනදී ඔබලාගේ ස්ථාවරය කුමක්ද?
පිළිතුර:- පාර්ලිමේන්තු මන්ත්‍රී 113ක් එකතු වී පාර්ලිමේන්තුව විසුරුවා හැරීමේ යෝජනාවක් සම්මත කරනවා නම් ඒක ප්‍රශ්නයක් නැහැ. එහෙත් පාර්ලිමේන්තුව විසුරුවීමේ නිල අයිතිය ජනපතිට තිබුණාට ඒ සඳහා ඔහුට සදාචාර අයිතියක් නැහැ. මොකද එතුමා පළාත් පාලන ඡන්දය කල් දැම්මා. ඒක ජනතා පරමාධිපත්‍යය පිළිබඳ ප්‍රශ්නයක්. ආර්ථිකය හදන්න, ණය ප්‍රතිව්‍යහුගත කරන්න කියා ඒ ඡන්දය කල් දැම්මා. එහෙම නම් මහ ඡන්දය තියන්න කලින් පළාත් පාලන ඡන්දය තියන්න ඕන. බැසිල්ට අවශ්‍ය රාජපක්ෂ පස්දෙනයි, එයාට හිතවත් පිරිසකුයි පාර්ලිමේන්තුවට යවා අස්ථාවර පාර්ලිමේන්තුවක් හදා රජුන් තනන්නා වෙන්නයි. එහෙම නැතුව ජනතාවගේ පරාමාධිපත්‍ය පිළිබඳ ප්‍රශ්නයකට නෙමෙයි. මොන ඡන්දය තිබ්බත් රාජපක්ෂ මහත්වරුන්ගේ බලාපොරොත්තු ඉටු වෙන්නේ නැහැ.
ප්‍රශ්නය:- ඉදිරි ජනපතිවරණයේදී සියයට පනහ ඉක්මවීම අපහසු බව විවිධ සමීක්ෂණ වලින් අනාවරණය වී ඇති බව සඳහන් වුවත් ජා.ජ.බ. සියයට පනහ ඉක්මවා ඇති බවට මත පළවෙනවා නේද?
පිළිතුර:- එක්කෝටි හැට ලක්ෂයකින් පන්සිය තිස් දෙදෙනකු ගෙන් අසා ඒක තීරණය කරන්න බැහැ. අද තිබෙන බොහොමයක් ජනමත සමීක්ෂණ මධ්‍යස්ථ ඒවා නෙමෙයි. යම් පුරෝකථනයක් කරන්න නම් ඒ ඒ සමීක්ෂණවල සාම්පලයේ ප්‍රමාණය ඉතා වැදගත්. ඍජු ප්‍රශ්න කිරීම්වලදී තම මතය නිවැරදිව ප්‍රකාශ කරන පිරිස ඉතා අඩුයි. සමීක්ෂණයක් මූලධර්මවලට අනුකූලව පැවැත්විය යුතුයි. එවැනි විද්‍යානුකූල පදනමක් මත මේ වනතෙක් කිසිදු සමීක්ෂණයක් පවත්වා තිබෙනවා මම නම් දැක්කේ නැහැ. ඔය බොහෝ ඒවා සමීක්ෂණ නෙමෙයි.
ප්‍රශ්නය:- මේ සිටින කොටස්වලට මේ රට ගොඩනගන්න පුළුවන්ද?
පිළිතුර:- රට ගොඩනැගිය හැකි පිරිසක් සිටිනවා. මාධ්‍යවල වැජඹෙන අය, සමාජ මාධ්‍යවල පිම්බෙන අය, මට පුළුවන් මම දක්ෂයා කියමින් පම්පෝරි ගහන අයගේ කළමනාකරණ හැකියාව පිළිබඳව ජනතාව අවධානය යොමුකළ යුතුයි. දැන් ව්‍යාපාරිකයොත් ඇවිත්. මේ අය මුදල් ඉපැයූ ආකාරය අවධානයට ගත යුතුයි. ඇමැතිකම් කළ අය ඒවා කළ ආකාරය සෙවිය යුතුයි. එවැනි අවබෝධයකින් ඡන්දය දිය යුතුවා මිස ගෝඨාභයට දුන්නා වගේ ඡන්දය දී රැවටෙන්න එපා කියලයි කියන්න වෙන්නේ.
සාකච්ඡා කළේ - චමින්ද මුණසිංහ
@Lankadeepa
