උගන්ඩාව සහ සී ෂෙල්ස් රාජ්‍යයන්හි ඇතැයි පැවසූ සිය පවුලේ වත්කම් සම්බන්ධයෙන්ද විමර්ශන සිදු කරන්නැයි
පොහොට්ටු පක්ෂයේ ජාතික සංවිධායක, හිටපු පාර්ලිමේන්තු මන්ත්‍රී නාමල් රාජපක්ෂ ආණ්ඩුවට අභියෝග කර සිටියි.
අපරාධ පරීක්ෂණ දෙපාර්තමේන්තුව (CID) වෙත පැමිණ ප්‍රකාශයක් ලබා දී නැවත ඉන් පිටව යන අවස්ථාවේදී මාධ්‍ය වෙත අදහස් දක්වමින් ඔහු එම අභියෝගය සිදු කළේය.
මලයාසියානු ව්‍යාපාරිකයෙකුගෙන් මුදල් ගත් බවට යහපාලන ආණ්ඩුව සමයේ ඉදිරිපත්ව තිබූ පැමිණිල්ලක වැඩිදුර විභාගයට අදාලව හිටපු අමාත්‍ය නාමල් රාජපක්ෂ ගෙන් අපරාධ පරීක්ෂණ දෙපාර්තමේන්තුව(CID) අද ප්‍රකාශ සටහන් කර ගෙන තිබිණ.
2011 - 12 කාලසීමාවේ මලයාසියානු ව්‍යාපාරිකයෙකු ඩොලර් මිලියන 100 ක මුදලක් මෙරට මන්ත්‍රීවරුන්ට ලබාදී ඇතැයි කියන සිද්ධියක් මුල්කරගෙන අපරාධ පරීක්ෂණ දෙපාර්තමේන්තුව විමර්ශනයක් ආරම්භකර තිබුණේ යහපාලන ආණ්ඩුව සමයේ ඉදිරිපත් වූ පැමිණිල්ලකට අනුවයි.
එම විමර්ශනයට අදාළව අද(24) පෙරවරුවේ අපරාධ පරීක්ෂණ දෙපාර්තමේන්තුවේ පෙනී සිටි නාමල් රාජපක්ෂ ගෙන් පැය දෙකකට අධික කාලයක් ප්‍රකාශ සටහන් කරගෙන තිබුණි.
ශ්‍රී ලංකා පොදුජන පෙරමුණේ ජාතික ලැයිස්තු අපේක්ෂක නාමල් රාජපක්ෂ,
" අද නම් එන්න කියලා තියෙන්නේ 2010 /15 කාලසීමාවේ මගේ කාර්යාලට ඇවිල්ලා සල්ලි තියලා ගිහිල්ලලු එක මහත්තයෙක් කියලා තියෙනවා. නිර්නාමික පැමිණිල්ලක්. ඉතින් නිර්නාමික පැමිණිල්ලට අනුව මුදල් ඇවිල්ලා මගේ කාර්යාල තියලා ගිහිල්ලා. ඒ පිළිබඳ මගෙන් අහනවා. මම ගෞරවයෙන් ඉල්ලනවා අපිව පාවිච්චි කරලා අපිට මඩ ගහලා අපේ පොලිසියට ගෙනල්ලා අපිව හිර කරන තැනට ගෙනල්ලා මේ රටේ ජනතාවගේ මනස වෙන පැත්තකට හරවලා ජනතාවට වෙච්ච පොරොන්දු වලින් බැහැර වෙන්න එපා."
ප්‍රශ්නය -
දැන් මේ නීතිය ක්‍රියාත්මක වීමක් නොවෙයි කියලද කියන්නෙ? පලිගැනීමක් කියලද ඔබතුමාලා කියන්නෙ?
නාමල් රාජපක්ෂ -
" ඒ පිළිබඳව බලන්න ඕනේ මේ ආණ්ඩු හැසිරෙන විදියට. මේ මැතිවරණයක් අස්සේ 2010/15 කාලසීමාවේ කාමරක නිර්ණාමිකව පැමිනිල්ලකට නිර්ණාමික පැමිණිල්ලකට ඇවිල්ලා මුදල් දුන්නා කියලා මැතිවරණයක් ඇතුලේ ඇවිල්ලා ප්‍රකාශයක් දෙන්න කියන කාරණය පිළිබදව අපි මීට වඩා කල්පනා කරන්න ඕනේ. හැබැයි ඉතින් අපිට ඒක ප්‍රශ්නයක් නෑ. මොකද ආණ්ඩුවට වැඩක් තියෙන්නත් එපැයි."
ප්‍රශ්නය -
යහපාලනේ ආණ්ඩුවේ වෙච්චදේම වෙනවා වගේද පේන්නෙ මේ යන විදිය?
නාමල් රාජපක්ෂ -
වෙනසක් නම් පේන්නේ නෑ. මොකද ඒ කාලේ එන්න කියපුවටම තමයි තවම ප්‍රශ්න කරන්නේ මේ.
ප්‍රශ්නය -
ජනාධිපතිවරයා කිව්වා හොරු අල්ලනවා හැබැයි කෙඳිරිගාන්න නම් එපා කියලා.
නාමල් රාජපක්ෂ -
ඒකනේ කෙඳිරි ගාන්නෙ නැතුව ආවේ. මම කෙඳිරි ගාන්නෙ නැතුව ආවේ ජනාධිපතිතුමාගේ වචනය අහක දාන්න බැරි නිසා.
උපුටාගැනීම - theleader
