වැලිකඩ පොලිසියේ පොලිස් ස්ථානාධිපතිවරයා ඇතුළු තවත් නිලධාරීන් දෙදෙනෙකුගේ
වැඩ තහනම් කිරීමට නිර්දේශ ඉදිරිපත් කර ඇත.
පසුගියදා වැලිකඩ පොලිස් සිර මැදිරිය තුළදී අත්අඩංගුවට ගත් සැකකරුවකු මියයෑමේ සිද්ධිය මීට හේතු වී තිබේ.
ඒ අනුව වැඩ බලන පොලිස්පතිවරයා විසින් එම නිර්දේශ ජාතික පොලිස් කොමිසම වෙත ඉදිරිපත් කිරීම සඳහා මහජන ආරක්ෂක හා පාර්ලිමේන්තු කටයුතු අමාත්‍යාංශය වෙත යොමු කර ඇත.
පොලිස් ස්ථානාධිපතිවරයාට අමතරව රාජකාරිය පැහැර හරින ලද බවට නිරීක්‍ෂණය වූ පොලිස් සැරයන්වරයකුගේ සහ පොලිස් කොස්තාපල්වරයකුගේ ද වැඩ තහනම් කර ඇත.
ඉකුත් 1 වැනිදා රාත්‍රියේදී නාවල ප්‍රදේශයේ නිවසකට ඇතුළු වී යැයි පවසමින් බදුල්ලේ සිට කොළඹට පැමිණ පුහුණු පාඨමාලාවක් හදාරන 25 වියැති තරුණයෙකු අත්අඩංගුවට ගැනීමෙන් පසු කලහකාරී ලෙස හැසිරීම හේතුවෙන් බව කියා පොලීසිය විසින් රෝහල් ගත කිරීමෙන් පසු මියගියේය.
රෝහල් ආරංචිමාර්ග වාර්තා කර තිබුණේ ඔහුව රෝහල්ගත කරද්දීද මිය ගොස් සිටි බවය.
කෙසේ වුවද මෙම සිදුවීමට එරෙහිව විශාල සමාජ මාධ්‍ය සහ ජන සමාජයෙන් විරෝධතාවන් එල්ලවූ අතර අත්අඩංගුවට පත් පුද්ගලයින් පහර දී ඝාතනය කිරීමේ වැඩි නමක් ලබා සිටින වැලිකඩ පොලිසිය මෙම සිදුවීමටත් මූලික වී ඇතැයි පැවසේ.
මෙම සිද්ධිය සම්බන්ධයෙන් සාධාරණ සහ අපක්ෂපාතී පරීක්ෂණයක් සිදුකිරීම සඳහා මෙම නිලධාරීන්ගේ වැඩ තහනම් කරන ලෙස වැඩ බලන පොලිස්පතිවරයා නිර්දේශ කර ඇත.
