- නීතිමය බාධක මත ඒ සඳහා බලපත්‍ර ලබාදීමට ශ්‍රී ලංකා බලධාරීන් සූදානම් නෑ..
- රජය ගුවන්තොටුපළ සංවර්ධනය සඳහා විකල්ප ආකෘතිය තීරණය කරන්නේ මහ මැතිවරණයෙන් පසුවයි.
මත්තල ජාත්‍යන්තර ගුවන් තොටුපළේ කළමනාකාරිත්වය ඉන්දු රුසියා හවුල් ව්‍යාපාරයකට පැවරීමට පසුගිය රජය විසින් ආරම්භ කරන ලද ක්‍රියාමාර්ගය නීතිමය බාධාවන් මත වත්මන් ශ්‍රී ලංකා බලධාරීහු ඊට බලපත්‍ර ලබාදීමට සූදානම් නොමැති බැවින්, එය අත්හැර දැමීමට සිදුව ඇති බව ඉහළ පෙළේ ආරංචි මාර්ග පවසයි.
පසුගිය රජය විසින් මෙම ගුවන් තොටුපළ කළමනාකරණය ඉන්දියාවේ Shaurya Aeronautics Pvt Ltd සමාගමට සහ රුසියාවේ Airports of Regions වෙත ඒකාබද්ධව පැවරීමට තීරණය කළේය.
පසුව, වාණිජ ගිවිසුමේ කෙටුම්පත නිෂ්කාශනය සඳහා නීතිපතිවරයා වෙත යොමු කරන ලදී.
සිවිල් ගුවන් සේවා අධිකාරී පනතට අනුව මෙරට ගුවන් තොටුපළ කළමනාකරණය කිරීමේ බලය ඇත්තේ Airport and Aviation Services (Pvt) Ltd (AASL) සමාගමට පමණි.
කෙසේ වුවද මත්තල ගුවන් තොටුපළේ කළමනාකාරිත්වය විදේශ ව්‍යාපාරයකට පැවරීමට ශ්‍රී ලංකාව උනන්දු වන්නේ නැති බව වාර්තා වේ.
එසේම, සමාගම අදාළ ව්‍යාපෘතිය ඉදිරියට ගෙන යාමට කැමැත්තක් නොදක්වන බවත්, දිගු කලක් තිස්සේ ශ්‍රී ලංකා බලධාරීන් සමඟ ඒ පිළිබඳ දැනුවත් කර නොමැති බවත් ආරංචිමාර්ග පවසයි.
වාණිජ ගිවිසුම සඳහා නීතිපතිවරයාගේ අනුමැතිය පිළිබඳව විමසූ විට, “ව්‍යාපෘතිය දැන් සිදුවීමක් නොවන නිසා එය දැන් අවශ්‍ය නොවන බව” පැවසූ බව ද එකී ආරංචිමාර්ග වැඩිදුරටත් පවසා තිබේ.
ගුවන් තොටුපළ සංවර්ධනය කිරීමේ විකල්ප සැලැස්ම පිළිබඳව නව රජය තීරණය කරනු ඇත්තේ මහ මැතිවරණයෙන් පසුව පමණක් බව එකී ආරංචි මාර්ග පවසයි.
චීනය විසින් ඉදිකරන ලද හම්බන්තොට වරායට යාබදව මෙම ගුවන් තොටුපළ ඉදිකර ඇත්තේ චීනයේ මූල්‍ය ආධාර මත ය.
@dailymirror ඇසුරිනි.
