ශ්‍රී ලංකා ක්‍රිකට් ආයතනයේ සභාපති ශම්මි සිල්වා ආසියානු ක්‍රිකට් කවුන්සිලයේ (ACC) සභාපතිවරයා ලෙස
පත් කර තිබේ. ඒ, ICC සභාපති ලෙස හිටපු ACC සභාපති ජේ ෂා තනතුරෙන් ඉවත් වීම මත ය.
ඒ අනුව ශ්‍රී ලංකා ක්‍රිකට් සභාපති ශම්මි සිල්වා ACC හි සභාපතිත්වය නිල වශයෙන් භාරගෙන ඇත.
ඔහු ආසියානු ක්‍රිකට් කවුන්සිලයේ මූල්‍ය හා අලෙවි කමිටුවේ සභාපතිවරයා ලෙස වසර කිහිපයක් සේවය කර ඇති අතර, එම තනතුර සඳහා අවශ්‍ය පුළුල් විශේෂඥ දැනුමක් ද ඔහු ලබා ඇත.
සභාපති ධූරයේ වැඩ භාරගනිමින් අදහස් දැක්වූ ශම්මි සිල්වා..
“ආසියානු ක්‍රිකට් කවුන්සිලයට නායකත්වය දීමට ලැබීම විශාල ගෞරවයක්. ක්‍රිකට් යනු ආසියාවේ හද ගැස්ම වන අතර, ක්‍රීඩාව නඟා සිටුවීමට, නැගී එන දක්ෂතා සඳහා අවස්ථා ලබා දීමට සහ මෙම සුන්දර ක්‍රීඩාව තුළින් අපව එක්සත් කරන බැඳීම් ශක්තිමත් කිරීමට සියලුම සාමාජික රටවල් සමඟ සමීපව කටයුතු කිරීමට මම බලාපොරොත්තු වෙනවා”.
ආසියානු ක්‍රිකට් කවුන්සිලයේ හිටපු සභාපති, වත්මන් ICC සභාපති ජේ ෂා සහ ඔහුගේ ආදර්ශවත් නායකත්වය මෙන්ම ඔහුගේ ධුර කාලය තුළ සිදු කළ සුවිශේෂී දායකත්වය වෙනුවෙන් අභිනව ACC සභාපතිවරයා සිය හෘදයාංගම කෘතඥතාව පළ කළේය.
ජේ ෂා ගේ භාරකාරත්වය යටතේ, ACC 2024-31 සඳහා ACC ආසියානු කුසලාන තරඟාවලියේ වාණිජ අයිතිවාසිකම් සඳහා ඉහළම වටිනාකමක් ලබා ගැනීම, නව මංපෙත් ඉසව් ව්‍යුහයක් හඳුන්වාදීම සහ ක්‍රිකට් ක්‍රීඩාවේ අඛණ්ඩ සංවර්ධනය සහ වර්ධනය ඇතුළුව කැපී පෙනෙන සන්ධිස්ථාන අත්කර ගත්තේය.
ශම්මි සිල්වා සභාපති ධූරයට පත්වන්නේ ආසියානු ක්‍රිකට් ක්‍රීඩාවේ තීරණාත්මක අවධියකය. ඔහු බිම් මට්ටමේ සංවර්ධනයට ප්‍රමුඛත්වය දීමටත්, නැගී එන ක්‍රිකට් ක්‍රීඩා කරන ජාතීන්ට ගෝලීය වේදිකාවේ දස්කම් දැක්වීමට සහාය වීමටත් අපේක්ෂා කරන බව පැවසේ.
