මෙරට පොල් කර්මාන්තය කඩා වැටීමට හෝ පොල් අස්වැන්න අඩුවීමට විදේශීය ආක්‍රමණශීලී
කෘමීන් හෝ බැක්ටීරියා බලපෑම නිසා සිදුවී ඇති බවට සැක කරන බව පොල් වගා කිරීමේ මණ්ඩලයේ සභාපති වෛද්‍ය සුනිමල් ජයකොඩි පවසයි.
ඔහු පවසන්නේ පොල් අස්වැන්න අඩුවීම විදේශීය ආක්‍රමණශීලී කෘමීන් හෝ බැක්ටීරියා සමඟ සම්බන්ධ බවට වාර්තා කිහිපයක් ඇති බවයි.
"පොල් ආනයනය කිරීමෙන් පොල් කර්මාන්තයට අහිතකර කෘමීන් හෝ බැක්ටීරියා ඇතුළුවීමේ අවදානමක් පවතිනවා. ඒ නිසා ඒ පිළිබඳව සොයා බැලීමට පත් කළ විශේෂ කමිටුව පොල් ආනයනය අත්හිටුවීමට තීරණය කර තිබෙනවා,"
ඔහු පැවසීය.
එහි ප්‍රතිඵලයක් ලෙස ප්‍රති අපනයනය සඳහා පොල් ආනයනය අත්හිටුවීමට කමිටුව තීරණය කර ඇති අතර දැන් පොල් මද (endosperm) පමණක් ආනයනය කිරීම කෙරෙහි අවධානය යොමු කර ඇත.
ආනයනික පොල් නිරෝධායන ක්‍රියාවලියකට භාජනය වුවද කෘමීන් හෝ බැක්ටීරියාවන් සම්පූර්ණයෙන් තුරන් කිරීමට තාක්ෂණික ක්‍රමවේදයක් නොමැති බවද වෛද්‍ය ජයකොඩි පෙන්වා දෙයි.
කෙසේ වෙතත්, පොල් අපනයන කර්මාන්තය පවත්වාගෙන යාමට පොල් ගෙඩි මිලියන 200ක් අවශ්‍ය බැවින් පොල් ආනයනය කිරීමට සූදානම් බව රජය පසුගියදා ප්‍රකාශ කළේය.
මේ සඳහා වැවිලි හා ප්‍රජා යටිතල පහසුකම් අමාත්‍යාංශයේ ලේකම්වරයා සහ කර්මාන්ත අමාත්‍යාංශයේ ලේකම්වරයා විසින් විශේෂ කමිටුවක් ද පත් කර ඇත.
ඒ අනුව අදාළ කමිටුවේ නිර්දේශ මත ආනයනය කිරීමට නියමිත පොල් මද ප්‍රමාණය තීරණය කරන බවද ඔහු පැවසීය.
